Firaq - Kisi Ka Yun Toh Hua Kaun Umar Bhar Phir Bhi

Kisi Ka Yun Toh Hua Kaun Umar Bhar Phir Bhi
Ye Husn-O-Ishq Toh Dhokha Hai Sab Magar Phir Bhi

Hazaar Baar Zamana Idhar Se Guzra Hai
Nayi Nayi Si Hai Kuch Teri Rahguzar Phir Bhi

Khusha Ishara-E-Paiham Zahe-Sakoot-E-Nazar
Daraaz Ho Ke Fasana Hai Mukhtsar Phir Bhi

Jhapak Rahi Hain Zaman-O-Makaan Ki Bhi Aankhen
Magar Hai Kaafila Aamada-E-Safar Phir Bhi

Shab-E-'Firaq' Se Aage Hai Aaj Meri Nazar
Ki Kat Hi Jayegi Ye Sham-E-Be_Sahar Phir Bhi

Kahin Yahi Toh Nahin Kaashif-E-Hayat-O-Mam'aat
Ye Husn-O-Ishq Bazaahir Hai Bekhabar Phir Bhi

Palat Rahe Hain Garib_Ul_Vatan Paltana Tha
Vo Kucha Ruu-Kashe-Zannat Ho Ghar Hai Ghar Phir Bhi

Luta Hua Chamn-E-Ishq Hai Nigahon Ko
Dikha Gaya Vahi Kya Kya Gul-O-Samar Phir Bhi

Kharab Ho Ke Bhi Socha Kiye Tere Mehzoor
Yahi Ki Teri Nazar Hai Teri Nazar Phir Bhi

Ho Be_Niyaaz-Asar Bhi Kabhi Teri Mitti
Vo Kimiya Hi Sahi Reh Gayi Kasar Phir Bhi

Lipat Gaya Tera Diwana Garche Manzil Se
Uddi Uddi Si Hai Kuch Khaaq-E-Rahguzar Phir Bhi

Teri Nigah Se Bachne Mein Umar Guzri Hai
Utar Gaya Rag-E-Jaan Mein Yaa Neshtar Phir Bhi

Gham-E-'Firaq' Ke Kushton Ka Hashr Kya Hoga
Ye Sham-E-Hizr Toh Ho Jayegi Sahar Phir Bhi

Fana Bhi Ho Ke Garanbaari-E-Hayat Na Pooch
Uthaye Uth Nahi Sakta Ye Dard-Sar Phir Bhi

Sitam Ke Rang Hain Har Iltafaat-E-Pinah Mein
Karamnuma Hain Tere Zor-E-Sar-Basar Phir Bhi

Khata Muaaf Tera Afav[Maufi] Bhi Hai Misl-E-Saza
Teri Saza Mein Hai Ik Shaan-E-Darguzar Phir Bhi

Agarche Bekhudi-E-Ishq Ko Zamana Hua
'Firaq' Karti Rahi Kaam Vo Nazar Phir Bhi

    --------------------