Firaq - Shaam-E-Gham Kuchh Us Nigaah-E-Naaz Ki Baaten Karo

 

Shaam-E-Gham Kuchh Us Nigaah-E-Naaz Ki Baaten Karo
Bekhudi Badhti Chali Hai Raaz Ki Baaten Karo

Nakhat-E-Zulf-E-Pareshaan, Daastaan-E-Shaam-E-Gham
Subah Hone Tak Isi Andaaz Ki Baaten Karo

Ye Sukoot-E-Yaas Ye Dil Ki Ragon Kaa Tootnaa
Khaamoshi Men Kuchh Shikast-E-Saaz Ki Baaten Karo

Har Rag-E-Dil Vajd Men Aati Rahe Dukhti Rahe
Yoon Hi Us Ke Jaa-O-Bejaa Naaz Ki Baaten Karo

Kuchh Qafas Ki Teeliyon Se Chhan Raha Hai Noor Saa
Kuchh Fazaa Kuchh Hasarat-E-Paravaaz Ki Baaten Karo

Jis Ki Furqat Ne Palat Di Ishq Ki Kaayaa "Firaq"
Aaj Usi Isaa-Nafas Dam-Saaz Ki Baaten Karo

-----------------------