Majaz - Dekhna Jazba-E-Muhabbat Ka Asar Aaj Ki Raat

Dekhna Jazba-E-Muhabbat Ka Asar Aaj Ki Raat
Mere Shaane Pe Hai Uss Shokh Ka Sar Aaj Ki Raat

Aur Kya Chaahiye Ab Ai Dile Mahroom Tujhe
Uss Ne Dekha Toh Ba-Andaaz-E- Deegar Aaj Ki Raat

Phool Kya Khaar Bhi Hain Aaj Gulistaan Ba-Kinar
Sangreze Hain Nigaahon Mein Guhar Aaj Ki Raat

Mehv-E-Gul-Gasht Hain Ye Kaun Mere Dosh-Ba-Dosh
Kah-Kashan Ban Gayi Har Rehguzar Aaj Ki Raat

Phoot Nikla Daro-Deewar Se Sailaab-E-Nishaat
Allah Allah Mere Kaif-E-Nazar Aaj Ki Raat

Shabnamistaan-E -Tajalli Ka Fasoon Kya Kahiye
Chaand Ne Phenk Diya Rakht-E-Safar Aaj Ki Raat

Noor Hi Noor Hai Kis Simt Uthaaoon Aankhen
Husn Hi Husn Hai Taa-Hadd-E-Nazar Aaj Ki Raat

Kasr-E-Geti Mein Umad Aaya Hai Toofaan-E-Hayaat
Maut Larzaan Hai Pas-E-Parda-E-Dar Aaj Ki Raat

Allah Allah Vo Peshaani-E-Seemin Ka Jamaal
Reh Gayi Jam Ke Sitaaron Ki Nazar Aaj Ki Raat

Aariz-E-Garm Pe Vo Rang-E-Shafaq Ki Kirnen
Vo Meri Shokh Nigaahon Ka Asar Aaj Ki Raat

Nargis-E-Naaz Mein Vo Neend Ka Halka Sa Khumaar
Vo Mere Naghma-E-Sheerin Ka Asar Aaj Ki Raat

Naghma-O-Mai Ka Yeh Toofaan-E-Tarab Kya Kahiye
Ghar Mera Ban Gaya Khayyam Ka Ghar Kya Kahiye

Meri Har Saans Pe Woh Un Ki Tavajjoh Kya Khoob
Meri Baat Pe Woh Jumbish-E-Sar Aaj Ki Raat

Woh Tabssum Hi Tabssum Ka Jamaal-E-Paiham
Woh Muhbbat Hi Muhbbat Ki Nazar Aaj Ki Raat

Uff Woh Vaarafatgi-E-Shauq Mein Ik Vahm-E-Lateef
Kap-Kapaate Huye Honton Pe Nazar Aaj Ki Raat

Apni Rifaayat Pe Jo Naazaan Hain Toh Naazaan Hi Rahen
Keh Do Anzuum Se Ke Dekhen Na Idhar Aaj Ki Raat

Un Ke Altaaf Ka Itna Hi Fasoon Kaafi Hai
Kam Hai Pehle Se Bahut Dard-E-Jigar Aaj Ki Raat

               ------------------------------