Majaz - Ek Nannhi Munni Si Pujaaran

Ek Nannhi Munni Si Pujaaran
Patli Baahen, Patli Gardan

Bhor Bhaye Mandir Aayi Hai
Aayi Nahin Hai, Maan Laayi Hai

Waqt Se Pahle Jaag Uthti Hai
Neend Bhi Aankhon Mein Bhari Hai

Thodi Tak Lat Aayi Hui Hai
Yun Hi Si Lahraai Hui Hai

Aankhon Mein Taaron Ki Chamak Hai
Mukhre Pe Chaandi Ki Jhalak Hai

Kaisi Sundar Hai, Kya Kahiye
Nannhi Si Ek Sita Kahiye

Dhoop Chuphe Taaraa Chamka Hai
Patthar Par Ek Phool Khila Hai

Chaand Ka Tukra Phool Ki Daali
Kamsin Seedhi Bholi-Bhaali

Kaan Mein Chaandi Ki Baali Hai
Haath Mein Peetal Ki Thaali Hai

Dil Mein Lekin Dhyaan Nahin Hai
Pooja Ka Kuch Gyaan Nahin Hai

Kaisii Bholi Aur Seedhi Hai
Mandir Ki Chhat Dekh Rahi Hai

Maan Bhaanph Kar Chutki Leti Hai
Chupke Chupke Hans Deti Hai

Hansna Rona Uska Mazhab
Us Ko Pooja Se Kya Matlab

Khud To Aayi Hai Mandir Mein
Man Uska Hai Gudia-Ghar Mein

--------------------