Shahryar - Ye Kyaa Jagah Hai Dosto Ye Kaun Saa Dayaar Hai

Ye Kyaa Jagah Hai Dosto Ye Kaun Saa Dayaar Hai
Hadd-E-Nigaah Tak Jahaan Ghubaar Hi Ghubaar Hai

Ye Kis Muqaam Par Hayaat Mujh Ko Leke Aa Gai
Na Bas Khushi Pe Hai Jahaan Na Gam Pe Ikhtiyaar Hai

Tamaam Umr Kaa Hisaab Maangati Hai Zindagi
Ye Meraa Dil Kahe To Kyaa Ye Khud Se Sharmsaar Hai

Bulaa Rahaa Kyaa Koi Chilamanon Ke Us Taraf
Mere Liye Bhi Kyaa Koi Udaas Beqaraar Hai

Na Jis Ki Shakl Hai Koi Na Jis Kaa Naam Hai Koi
Ik Aisi Shai Kaa Kyon Hamein Azal Se Intazaar Hai



------------------------