Amir Minai - Tund mai aur aise kamsin ke liye

Tund Mai Aur Aise Kamsin Ke Liye
Saaqiya Halki Si Laa In Ke Liye 

Mujh Se Rukhsat Ho Mera Ahad-E-Shabaab
Yaa Khuda Rakhna Na Us Din Ke Liye 

Hai Jawaani Khud Jawaani Ka Singaar
Saadgi Gahna Hai Is Sin Ke Liye

Sab Haseen Hain Zaahidon Ko Naa-Pasand
Ab Koi Hoor Aayegi In Ke Liye

Vasl Ka Din Aur Itana Mukhtasar
Din Gine Jaate They Is Din Ke Liye

Saari Duniya Ke Hain Wo Mere Siwaa
Main Ne Duniyaa Chhod Di Jin Ke Liye

Laash Par Ibarat Ye Kahti Hai 'Ameer'
Aaye They Duniya Mein Is Din Ke Liye

---------------