Daagh - Sitam Hi Karna Jafa Hi Karna Nigaah-E-Lutf Kabhi Na Karna

Sitam Hi Karna Jafa Hi Karna Nigaah-E-Lutf Kabhi Na Karna
Tumhe Qasam Hai Hamaare Sar Ki Hamaare Haq Main Kami Na Karna

Kahaan Ka Aana Kahaan Ka Jaana Wo Jaante Hi Nahin Ye Rasme
Wahaan Hai Waade Ki Bhi Ye Surat Kabhi To Karna Kabhi Na Karna

Hamari Mayyat Pe Tum Jo Aana To Chaar Aansu Bahaa Ke Jaana
Zara Rahe Paas-E-Aabru Bhi Kahin Hamaari Hansi Na Karna

Wo Ik Hamaara Tariq-E-Ulfat Ki Dushmanon Se Bhi Mil Ke Chalna
Ye Ek Sheva Teraa Sitamgar Ki Dost Se Dosti Na Karna

---------------------------