Daagh - Tumhaare Khat Men Nayaa Ik Salaam Kis Kaa Thaa

Tumhaare Khat Men Nayaa Ik Salaam Kis Kaa Thaa
Na Thaa Raqeeb To Aakhir Wo Naam Kis Kaa Thaa

Wo Qatl Kar Ke Har Kisee Se Poochhte Hain
Ye Kaam Kis Ne Kiyaa Hai Ye Kaam Kis Kaa Thaa

Wafaa Karenge Nibhaayenge Baat Maanenge
Tumhen Bhi Yaad Hai Kuchh Ye Kalaam Kis Kaa Thaa

Raha Na Dil Men Wo Be-Dard Aur Dard Rahaa
Muqeem Kaun Huaa Hai Maqaam Kis Kaa Thaa

Na Poochh-Paachh Thi Kisi Ki Na Aaw-Bhagat
Tumhaari Bazm Men Kal Ehtamaam Kis Kaa Thaa

Hamaare Khat Ke To Purze Kiye Padhha Bhi Naheen
Sun Jo Tum Ne Baa-Dil Vo Payaam Kis Kaa Thaa

Inheen Sifaat Se Hota Hai Aadami Mashahoor
Jo Lutf Aap Hi Karate To Naam Kis Kaa Thaa

Guzar Gaya Wo Zamaanaa Kahen To Kis Se Kahen
Khayaal Mere Dil Ko Subah-O-Shaam Kis Kaa Thaa

Har Ek Se Kahte Hain Kyaa "Daagh" Bewafaa Nikla
Ye Poochhe In Se Koi Wo Ghulaam Kis Kaa Thaa

---------------