Faraz - Ranjish Hi Sahi, Dil Hi Dukhaane Ke Liyay Aa

Ranjish Hi Sahi, Dil Hi Dukhaane Ke Liyay Aa
Aa Phir Se Mujhay Chhod Ke Jaaney Ke Liyay Aa

Pahlay Se Maraasim Na Sahi Phir Bhi Kabhi To
Rasm-O-Rah-E-Duniya Ko Nibhaaney Ke Liyay Aa

Kis Kis Ko Bataayain Ge Judaai Ka Sabab Ham
Tu Mujh Se Khafa Hai To Zamaaney Ke Liyay Aa

Kuchh To Mere Pindaar-E-Mohabbat Ka Bharam Rakh
Too Bhi To Kabhi Mujh Ko Manaaney Ke Liyay Aa

Ek Umr Se Hoon Lazzat-E-Giryaan Se Bhi Mahroom
Ai Raahat-E-Jaan Mujh Ko Rulaaney Ke Liyay Aa

Ab Tak Dil-E-Khush-Fahm Ko Hain Tujh Se Umeedain
Yeh Aakhri Shamain Bhi Bujhaaney Ke Liyay Aa

---------------------