Faraz - Teri Baaten Hi Sunaane Aaye

Teri Baaten Hi Sunaane Aaye,
Dost Bhi Dil Hi Dukhaane Aaye,

Phool Khilte Hain To Ham Sochte Hain,
Tere Aane Ke Zamaane Aaye,

Aisi Kuchh Chup Si Lagi Hai Jaise,
Ham Tujhe Haal Sunaane Aaye,

Ishq Tanhaa Hai Sar-E-Manzil-E-Gham,
Kaun Ye Bojh Uthaane Aaye,

Ajnabi Dost Hamen Dekh Ke Ham,
Kuchh Tujhe Yaad Dilaane Aaye,

Dil Dhadakta Hai Safar Ke Hangaam,
Kaash Phir Koi Bulaane Aaye,

Ab To Rone Se Bhi Dil Dukhta Hai,
Shaayad Ab Hosh Thikaane Aaye,

Kyaa Kahin Phir Koi Basti Ujdi,
Log Kyoon Jashn Manaane Aaye,

So Raho Maut Ke Pahloo Mein “Faraz”,
Neend Kis Waqt Na Jaane Aaye.

-----------------