Faraz - Ye Tabiyat Hai To Khud Aazaar Ban Jaayenge Ham

Ye Tabiyat Hai To Khud Aazaar Ban Jaayenge Ham,
Chaaragar Royenge Aur Ghamkhwaar Ban Jaayenge Ham,

Ham Sar-E-Chaak-E-Wafaa Hain Aur Teraa Dast-E-Hunar,
Jo Banaa Degaa Hamen Ai Yaar Ban Jaayenge Ham

Kyaa Khabar Thi Ai Nigaar-E-Sher Tere Ishq Men,
Dilbaraan-E-Shahar Ke Dildaar Ban Jaayenge Ham ,

Sakht Jaan Hain Par Hamaari Ustawaari Par Na Jaa,
Aise Tootenge Teraa Iqaraar Ban Jaayenge Ham ,

Aur Kuchh Din Baithne Do Koo-E-Jaanaan Men Hamen,
Rafta Rafta Saayaa-E-Deewaar Ban Jaayenge Ham ,

Is Qadar Aasaan Na Hogi Har Kisi Se Dosti,
Aashnaai Men Teraa Mayaar Ban Jaayenge Ham,

Mir-O-Ghaalib Kya Ke Ban Paaye Nahin Faiz-O-Firaaq ,
Zam Ye Tha Roomi-O-Ataar Ban Jaayenge Ham,

Dekhne Men Shaakh-E-Gul Lagte Hain Lekin Dekhanaa
Dast-E-Gul-Cheen Ke Liye Talwaar Ban Jaayenge Ham

Ham Chiraaghon Ko To Taareeki Se Ladna Hai 'Faraz'
Gul Hue Par Subah Ke Aasaar Ban Jaayenge Ham

------------------------