Jan Nisar Akhtar - Ashaar Mere Yoon To Zamaane Ke Liye Hain

Ashaar Mere Yoon To Zamaane Ke Liye Hain
Kuchh Sher Faqat Unko Sunaane Ke Liye Hain

Ab Ye Bhi Naheen Theek Ki Har Dard Mitaa Den
Kuchh Dard Kaleje Se Lagaane Ke Liye Hain

Aankhon Men Jo Bhar Loge To Kaanton Se Chubhenge
Ye Khvaab To Palkon Pe Sajaane Ke Liye Hain

Dekhoon Tere Haathon Ko To Lagata Hai Tere Haath
Mandir Men Faqat Deep Jalaane Ke Liye Hain

Socho To Badi Cheez Hai Tahzib Badan Ki
Varnaa To Badan Aag Bujhaane Ke Liye Hain

Ye Ilm Ka Sauda Ye Risaale Ye Kitaaben
Ik Shakhs Ki Yaadon Ko Bhulaane Ke Liye Hain

---------------------