Jigar - Kaam Aakhir Jazbaa-E-Be-Ikhtiyaar Aa Hi Gaya

Kaam Aakhir Jazbaa-E-Be-Ikhtiyaar Aa Hi Gaya
Dil Kuch Is Surat Se Tadpa Un Ko Pyaar Aa Hi Gaya

Jab Nigaahen Uth Gai Allah Re Meraaj-E-Shauq
Dekhta Kya Hoon Wo Jaan-E-Intezaar Aa Hi Gaya

Haaye Ye Husn-E-Tasawwur Ka Fareb-E-Rang-O-Bu
Main Ne Samjha Jaise Wo Jaan-E-Bahaar Aa Hi Gaya

Haan Saza De Ai Khuda-E-Ishq Ai Taufeeq-E-Gam
Phir Zabaan-E-Be-Adab Par Zikr-E-Yaar Aa Hi Gaya

Is Tarah Khush Hoon Kisi Ke Wada-E-Farda Pe Main
Dar-Haqeeqat Jaise Mujh Ko Aitbaar Aa Hi Gaya

Haa_E Kaafir Dil Ki Ye Kaafir Junoon-Angeziyaan
Tum Ko Pyaar Aaye Na Aaye Mujh Ko Pyaar Aa Hi Gaya

Dard Ne Karawat Hi Badli Thi Ki Dil Ki Aad Se
Dafatan Parda Utha Aur Pardadaar Aa Hi Gaya

Jaan Hi De Di Jigar Ne Aaj Paa-E-Yaar Par
Umr Bhar Ki Beqaraari Ko Qaraar Aa Hi Gaya

----------------------------