Momin - Naavak Andaaz Jidhar Deeda-E-Jaanaan Honge

Naavak Andaaz Jidhar Deeda-E-Jaanaan Honge
Neem-Bismil Kai’ Honge Kai’ Bejaan Honge

Taab-E-Nazzaara Nahin Aaina Kya Dekhne Doon
Aur Ban Jaayenge Tasvir Jo Hairaan Honge

Too Kahaan Jaayegi Kuchh Apnaa Thikaana Kar Le
Ham To Kal Khwaab-E-Adam Men Shab-E-Hijraan Honge

Phir Bahaar Aai Wahi Dasht-E-Nawardi Hogi
Phir Wahi Paaon Wahi Khaar-E-Mughlaan Honge

Naasiha Dil Men Too Itna To Samajh Apne, Ki Ham
Laakh Naadaan Huye, Kya Tujh Se Bhi Naadaan Honge

Ek Ham Hain Ke Huye Aise Pashemaan, Ke Bas
Ek Wo Hain Ke Jinhen Chaah Ke Armaan Honge

Minnat-E-Hazarat-E-Eisaa Na Uthaayenge Kabhi
Zindagi Ke Liye Sharminda-E-Ehsaan Honge

Umr To Saari Kati Ishq-E-Butaan Men "Momin"
Ab Aakhiri Waqt Men Kya Khaak Musalamaan Honge

-------------------------