Qateel - Apne Hothon Par Sajaanaa Chaahataa Hoon

Apne Hothon Par Sajaanaa Chaahataa Hoon
Aa Tujhe Main Gungunaanaa Chaahataa Hoon

Koi Aansoo Tere Daaman Par Giraakar
Boond Ko Moti Banaanaa Chaahataa Hoon

Thak Gayaa Main Karte-Karte Yaad Tujhako
Ab Tujhe Main Yaad Aanaa Chaahataa Hoon

Chhaa Rahaa Hai Saari Basti Men Andheraa
Raushni Ho Ghar Jalaanaa Chaahataa Hoon

Aakhari Hichki Tere Zaanon Pe Aaey
Maut Bhi Main Shaayraanaa Chaahataa Hoon

--------------------