Qateel - Sadma To Hai Mujhe Bhi Ki Tujhse Juda Hun Main

Sadma To Hai Mujhe Bhi Ki Tujhse Juda Hun Main,
Lekin Ye Sochta Hun Ki Ab Tera Kya Hun Main,

Bikhra Parha Hai Tere Hi Ghar Mein Tera Wajood,
Bekaar Mahafilon Mein Tujhe Dhundhta Hun Main,

Main Khud-Kashi Ke Jurm Ka Karta Hun Aitaraf,
Apne Badan Ki Qabr Mein Kabse Khada Hun Main,

Kis Kiska Naam Loon Zaban Par Ki Tere Sath,
Har Roz Ek Shakhs Naya Dekhta Hun Main,

Na Jane Kis Adaa Se Liya Too Ne Mera Naam,
Duniya Samajh Rahi Hai Ke Sab Kuch Tera Hun Main,

Le Mere Tajurbon Se Sabak Ae Mere Raqib,
Do Chaar Saal Umr Mein Tujhse Bada Hun Main,

Jaaga Hua Zamir Wo Aaina Hai "Qateel",
Sone Se Pahle Roz Jise Dekhta Hun Main.

---------------------