Sahir - Dekhaa Hai Zindagi Ko Kuchh Itanaa Qarib Se

Dekhaa Hai Zindagi Ko Kuchh Itanaa Qarib Se
Chehare Tamaam Lagane Lage Hain Ajib Se

Is Rengati Hayaat Ka Kab Tak Uthaayen Baar
Bimaar Ab Ulajhane Lage Hain Tabib Se

Har Gaam Par Hai Majamaa-E-Ushshaaq Muntazir
Maqtal Ki Raah Milati Hai Koo-E-Habib Se

Is Tarah Zindagi Ne Diyaa Hai Hamaaraa Saath
Jaise Koi Nibaah Rahaa Ho Raqib Se

Ai Rooh-E-Asar Jaag Kahaan So Rahi Hai Too
Aawaaz De Rahe Hain Payambar Salib Se

  --------------------