Sahir - Kabhi Kabhi Mere Dil Men Khayaal Aataa Hai

Kabhi Kabhi Mere Dil Men Khayaal Aataa Hai

Ke Zindagi Teri Zulfon Ki Narm Chaaon Men
Guzarane Paati To Shaadaab Ho Bhi Sakati Thi
Ye Tirgi Jo Meri Zist Ka Muqaddar Hai
Teri Nazar Ki Shuaaon Men Kho Bhi Sakati Thi

Ajab Na Thaa Ke Main Begaanaa-E-Alam Ho Kar
Tere Jamaal Ki Raanaaiyon Men Kho Rahataa
Teraa Gudaaz Badan Teri Nim-Baar Aankhen
Inhin Hasin Fasaanon Men Maaho Rahataa

Pukaratin Mujhe Jab Talkhiyaan Zamaane Ki
Tere Labon Se Halaawat Ke Ghoont Pi Letaa
Hayaat Chikhati Phirati Barahanaa-Sar, Aur Main
Ghaneri Zulfon Ke Saaye Men Chhup Ke Ji Letaa

Magar Ye Ho Na Saka Aur Ab Ye Aalam Hai
Ke Too Nahin, Teraa Gham, Teri Justajoo Bhi Nahin
Guzar Rahi Hai Kuchh Is Tarah Zindahi Jaise
Ise Kisi Ke Sahaare Ki Aarazoo Bhi Nahin

Zamaane Bhar Ke Dukhon Ko Lagaa Chuka Hoon Gale
Guzar Rahaa Hoon Kuchh Anjaani Guzar-Gaahon Se
Muhib Saaye Meri Simt Badate Aate Hain
Hayaat-O-Maut Ke Pur-Haul Khaarazaaron Se

Na Koi Jaadaa Na Manzil Na Roshani Ka Suraagh
Bhatak Rahi Hai Khaalaaon Men Zindagi Meri
Inhin Khalaaon Men Rah Jaaoongaa Kabhi Khokar
Main Jaanataa Hoon Meri Ham-Nafas Magar Yoon Hi

Kabhi Kabhi Mere Dil Men Khayaal Aataa Hai

----------------------