Sahir -Kal Aur Aaj- Kal Bhi Boondein Barsi Thin

Kal Bhi Boondein Barsi Thin
Kal Bhi Baadal Chhaye The

Aur Kavi Ne Sochaa Thaa

Baadal Ye Aakaash Ke Sapne, In Zulfon Ke Saaye Hain
Dosh-E-Hawaa Par Maikhaane Hi Maikhaane Ghir Aaye Hain
Rut Badlegi, Phool Khileinge, Jhonke Madhu Barsaayeinge
Ujle Ujle Kheton Mein Rangeen Aanchal Lahraayeinge
Charwaahe Bansi Ki Dhun Se Geet Fazaa Mein Boyeinge
Aamon Ke Jhundon Ke Neeche Pardesi Dil Kholeinge
Peng Barhaati Gori Ke Maathe Se Kaunde Lapkeinge
Johar Ke Thahre Paani Mein Taare Aankhein Jhapkeinge
Uljhi Uljhi Raahon Mein Wo Aanchal Thaame Aayeinge
Dharti, Phool, Aakaash Sitaare Sapna Sa Ban Jaayeinge

Kal Bhi Boondein Barsi Thin
Kal Bhi Baadal Chhaye The

Aur Kawi Ne Socha!

Aaj Bhi Boondein Barseingi
Aaj Bhi Baadal Chhaye Hain

Aur Kavi Is Soch Mein Hai

Basti Pe Baadal Chhaaye Hain, Par Ye Basti Kiski Hai
Dharti Par Amrit Barsegaa, Lekin Dharti Kiski Hai
Hal Jotegi Kheton Mein Allhad Toli Dahqaanon Ki
Dharti Se Phootegi Mehnat Faaqaakash Insaanon Ki
Faslein Kat Ke Mehnatkash, Galle Ke Dher Lagaayeinge
Jaageeron Ke Maalik Aakar Sab Poonji Le Jaayeinge
Boodhe Dahqaanon Ke Ghar Baniye Ki Qurqi Aayegi
Aur Qarze Ke Sood Mein Koi Gori Bechi Jaayegi
Aaj Bhi Jantaa Bhooki Hai Aur Kal Bhi Jantaa Tarsi Thi
Aaj Bhi Rimjhim Barkhaa Hogi, Kal Bhi Baarish Barsi Thi

Aaj Bhi Baadal Chaaye Hain
Aaj Bhi Boondein Barseingi

Aur Kavi Is Soch Mein Hai!

                 ---------------------