Sahir - Mohabbat Tark Ki Main Ne Garebaan Si Liyaa Main Ne

Mohabbat Tark Ki Main Ne Garebaan Si Liyaa Main Ne
Zamaane Ab To Khush Ho Zahar Ye Bhi Pi Liyaa Main Ne

Abhi Zinda Hoon Lekin Sochta Rahata Hoon Khalwat Men
Ki Ab Tak Kis Tamanna Ke Sahaare Ji Liyaa Main Ne

Unhen Apna Nahin Sakata Magar Itana Bhi Kya Kam Hai
Ki Kuchh Muddat Hasin Khwaabon Men Kho Kar Ji Liya Main Ne

Bas Ab To Daaman-E-Dil Chhod Do Bekaar Ummido
Bahut Dukh Sah Liye Main Ne Bahut Din Ji Liyaa Main Ne

----------------------