Waseem - Usoolon Pe Jahaan Aanch Aaye Takraana Zaroori Hai

Usoolon Pe Jahaan Aanch Aaye Takraana Zaroori Hai
Jo Zinda Hon To Phir Zinda Nazar Aana Zaroori Hai

Nai Umron Ki Khud-Mukhtaariyon Ko Kaun Samjhaaye
Kahaan Se Bach Ke Chalna Hai Kahaan Jaana Zaroori Hai

Thake Haare Parinde Jab Basere Ke Liye Laute
Saliqamand Shaakhon Ka Lachak Jaana Zaroori Hai

Bahut Bebaak Aankhon Main Taal-Luq Tik Nahin Paata
Mohabbat Main Kashish Rakhne Ko Sharmaana Zaroori Hai

Saliqaa Hi Nahin Shaayad Use Mahasoos Karane Ka
Jo Kehta Hai Khuda Hai To Nazar Aana Zaroori Hai

Mere Honthon Pe Apni Pyaas Rakh Do Aur Phir Socho
Ki Is Ke Baad Bhi Duniya Main Kuch Paana Zaroori Hai

----------------------