Parveen Shakir - Baarish Hui To Phoolon Ke Tan Chaak Ho Gaye

Baarish Hui To Phoolon Ke Tan Chaak Ho Gaye
Mausam Ke Haath Bhig Ke Saffaak Ho Gaye

Baadal Ko Kya Khabar Ki Baarish Ki Chaah Men
Kitne Buland-O-Baalaa Shajar Khaak Ho Gaye

Jugnoo Ko Din Ke Vaqt Pakadne Ki Zid Karen
Bachche Hamaare Ahad Ke Chaalaak Ho Gaye

Laharaa Rahi Hai Barf Ki Chaadar Hataa Ke Ghaas
Sooraj Ki Shah Pe Tinke Bhi Bebaak Ho Gaye

Sooraj Dimaagh Log Bhi Iblaagh-E-Fikr Men
Zulf-E-Shab-E-Firaaq Ke Pechaak Ho Gaye

Jab Bhi Gharib-E-Shahar Se Kuchh Guftagoo Hui
Lahaje Havaa-E-Shaam Ke Namnaak Ho Gaye

Saahil Pe Jitne Aab-Guzidaa The Sab Ke Sab
Dariyaa Ke Rukh Badalte Hi Tairaak Ho Gaye

--------------------