Parveen Shakir- nazm- Hamaare Daramiyaan Aisaa Koi Rishta Nahin Tha

Hamaare Daramiyaan Aisaa Koi Rishta Nahin Thaa

Tere Shaanon Pe Koi Chhat Nahin Thi

Mere Zimme Koi Aangan Nahin Thaa

Koi Vaadaa Teri Zanjir-E-Paa Banaane Nahin Paayaa

Kisi Iqaraar Ne Meri Kalaai Ko Nahin Thaamaa

Havaa-E-Dasht Ki Maanind

Too Aazaad Thaa

Raaste Teri Marzi Ke Taabe They

Mujhe Bhi Apani Tanhaai Pe

Dekhaa Jaaye To

Pooraa Tasarruf Thaa

Magar Jab Aaj Too Ne

Raastaa Badalaa

To Kuchh Aisaa Lagaa Mujh Ko

Ke Jaise Too Ne Mujh Se Bevafaai Ki

--------------