Parveen Shakir - Paa-Ba-Gil Sab Hain Rihaai Ki Kare Tadbir Kaun

Paa-Ba-Gil Sab Hain Rihaai Ki Kare Tadbir Kaun
Dast-Bastaa Shahar Men Khole Meri Zanjir Kaun

Meraa Sar Haazir Hai Lekin Meraa Munsif Dekh Le
Kar Rahaa Hai Mere Fard-E-Jurm Ko Tahrir Kaun

Meri Chaadar To Chhini Thi Shaam Ki Tanhaai Ne
Beridaai Ko Meri Phir De Gayaa Tashahir Kaun

Neend Jab Khwaabon Se Pyaari Ho To Aise Ahad Men
Khvaab Dekhe Kaun Aur Khwaabon Ko De Taabir Kaun

Ret Abhi Pichhle Makaanon Ki Na Vaapas Aai Thi
Phir Lab-E-Saahil Gharaunda Kar Gayaa Taamir Kaun

Saare Rishte Hijraton Men Saath Dete Hain To Phir
Shahar Se Jaate Hue Hotaa Hai Daamangir Kaun

Dushmanon Ke Saath Mere Dost Bhi Aazaad Hain
Dekhnaa Hai Khenchtaa Hai Mujh Pe Pahlaa Tir Kaun

-------------------