Zauq - Marte Hain Tere Pyaar Se Ham Aur Ziyaada

Marte Hain Tere Pyaar Se Ham Aur Ziyaada,
Too Lutf Men Kartaa Hai Sitam Aur Ziyaada ,

Den Kyon Ki Na Vo Daagh-E-Alam Aur Ziyaada ,
Qeemat Men Badhe Dil Ke Diram Aur Ziyaada,

Kya Hove Gaa Do-Chaar Qadah Se Mujhe Saaqi,
Main Loon Gaa Tere Sar Ki Qasam Aur Ziyaada,

Vo Dil Ko Churaa Kar Jo Lage Aankh Churaane,
Yaaron Kaa Gayaa Un Pe Bharam Aur Ziyaada,

Kyon Main Ne Kahaa Tujh Sa Khudaai Men Nahin Aur,
Maghroor Huaa Ab Vo Sanam Aur Ziyaada ,

Lete Hain Samar Shaakh-E-Samaravar Ko Jhukaakar ,
Jhukte Hain Sakhi Vaqt-E-Karam Aur Ziyaada ,

Jo Kunj-E-Qana'at Men Hain Taqdir Pe Shaakir,
Hai "Zauq" Baraabar Unhen Kam Aur Ziyaada

--------------------