Zauq - Phirtaa Liye Chaman Men Hai Deevaanapan Mujhe

Phirtaa Liye Chaman Men Hai Deevaanapan Mujhe ,
Zanjeer-E-Paa Hai Mauj-E-Naseem-E-Chaman Mujhe,

Hoon Shamaa Yaa Ki Sholaa Khabar Kuchh Nahin Magar,
Fanoos Ho Rahaa Hai Meraa Pairaahan Mujhe,

Kooche Men Teri Kaun Thaa Letaa Bhalaa Khabar,
Shab Chaandni Ne Aake Pahnaayaa Kafan Mujhe ,

Dikhlaataa Ik Adaa Men Hai Sau-Sau Tarah Banaav,
Kis Saadapan Ke Saath, Teraa Baankpan Mujhe,

Aayaa Hoon Noor Leke Main Bazm-E-Sukhan Men 'Zauq',
Aankhon Pe Sab Bithaayen Ge Ahl-E-Sukhan Mujhe

--------------------------