Zafar - Baat Karni Mujhe Mushkil Kabhi Aisi To Na Thi

Baat Karni Mujhe Mushkil Kabhi Aisi To Na Thi
Jaisi Ab Hai Teri Mahafil Kabhi Aisi To Na Thi

Le Gayaa Chheen Ke Kaun Aaj Teraa Sabr-O-Qarar
Be-Qaraari Tujhe Ai Dil Kabhi Aisi To Na Thi

Chashm-E-Qaatil Meri Dushman Thi Hamesha Lekin
Jaise Ab Ho Gai Qaatil Kabhi Aisi To Na Thi

Un Ki Aankhon Ne Khudaa Jaane Kiya Kya Jaadoo
Ke Tabiyat Meri Maail Kabhi Aisi To Na Thi

Aks-E-Rukh-E-Yaar Ne Kis Se Hai Tujhe Chamakaayaa
Taab Tujh Men Maah-E-Kaamil Kabhi Aisi To Na Thi

Kya Sabab Too Jo Bigadta Hai "Zafar" Se Har Baar
Khoo Teri Hoor-E-Shamaail Kabhi Aisi To Na Thi

-------------------------