Dil Mat Tapak Nazar Se Ke Paaya Na Jaay Ga,
Jun Ashk Phir Zamin Se Uthaaya Na Jaay Ga
Kaaba Agar-Che Toota To Kya Jaa-E-Ghum Hai Shaikh
Kuchh Qasr-E-Dil Nahin Ke Banaaya Na Jaay Ga
Tegh-E-Jafaa-E-Yaar Se Dil, Sar Na Pheriyo
Phir Munh Wafa Ko Ham Se Dikhaya Na Jaay Ga
Rukhsat Hai Baaghbaan Ki Tuk Dekh Lein Chaman
Jaate Hain Waan Jahaan Se Phir Aaya Na Jaay Ga
Pahunchen Ge Is Chaman Mein Na Hum Deed Ko Kabhi
Jun Gull Yeh Chaak-E-Jab Silaya Na Jaay Ga
Amaama Ko Utaar Ke Padhyo Namaz Shaikh,
Sajde Se Varna Sar Ko Uthaya Na Jaay Ga
Zalim Main Keh Raha Tha Tu Is Khoon Say Dar Guzar,
‘Sauda’ Ka Qatl Hai Yeh Chhupaya Na Jaay Ga
Daaman-E-Daagh-Tegh Jo Dhoya To Kya Hua
Aalam Ke Dil Se Daagh Mitaya Na Jaay Ga
---------------------
0 Comments