Sahir Ludhianvi- Khud-Daariyon Ke Khoon Ko Arzaan Na Kar Sake

Khud-Daariyon Ke Khoon Ko Arzaan Na Kar Sake
Ham Apne Jauharon Ko Numaayaan Na Kar Sake

Ho Kar Kharaab-E-Mai Tere Gham To Bhulaa Diye
Lekin Gham-E-Hayaat Ka Darmaan Na Kar Sake

Tootaa Tilism-E-Ahd-E-Muhabbat Kuchh Is Tarah
Phir Aarzoo Ki Shamma-Farozaan Na Kar Sake

Har Shai Qareeb Aa Ke Kashish Apni Kho Gayi
Vo Bhi Ilaaj-E-Shauq-E-Gurezaan Na Kar Sake

Kis Darjah Dil-Shikan The Muhabbat Ke Haadse
Ham Zindagi Mein Phir Koi Armaan Na Kar Sake

Maayoosiyon Ne Chheen Liye Dil Ke Valvale
Vo Bhi Nishaat-E-Rooh Ka Saamaan Na Kar Sake

  --------------------------