Jaun Elia - Kab Us Ka Visal Chahiye Tha

Kab Us Ka Visal Chahiye Tha
Bas Ek Khayal Chahiye Tha

Kab Dil Ko Jawab Se Gharaz Thi
Honton Ko Sawal Chahiye Tha

Shauq Ek Nafs Tha Aur Wafa Ko
Paas-E-Mah-O-Saal Chahiye Tha

Ek Chehra-E-Saada Tha Jo Hum Ko
Be-Misl-O-Misaal Chahiye Tha

Ek Karb Mein Zaat-O-Zindagi Hain
Mumkin Ko Muhaal Chahiye Tha

Main Kya Hoon Bas Ek Malaal-E-Maazi
Us Shakhs Ko Haal Chahiye Tha

Hum Tum Jo Bichhad Gaye Hain Hum Ko
Kuchh Din To Malaal Chahiye Tha

----------------------------