Jaun Elia - Be-Qaraari Si Be-Qaraari Hai

Be-Qaraari Si Be-Qaraari Hai
Vasl Hai Aur Firaaq Taari Hai

Jo Guzaari Na Jaa Saki Hum Se
Hum Ne Woh Zindagi Guzaari Hai

Ek Mehek Simt-E-Dil Se Aayi Hai
Main Ye Samjhaa Teri Sawaari Hai

Haadson Ka Hisaab Hai Apna
Warna Har Aan Sab Ki Baari Hai

Khush Rahe Tu Ke Zindagi Apni
Umr Bhar Ki Umeed-Waari Hai

Bin Tumhaare Kabhi Nahin Aayi
Kya Meri Neend Bhi Tumhaari Hai

Aap Mein Kaise Aaun Main Tujh Bin
Saans Jo Chal Rahi Hai, Aari Hai

Us Se Kahiyo Ke Dil Ki Galiyon Mein
Raat Din Teri Intezaari Hai

Hijr Ho Ya Visaal Ho, Kuch Ho
Hum Hain Aur Uski Yaadgaari Hai

--------------------------