Jaun Elia - Dil Ne Wafa Ke Naam Par

Dil Ne Wafa Ke Naam Par Kaar-E-Jafa Nahin Kiya
Khud Ko Halaak Kar Liya Khud Ko Fida Nahin Kiya

Kaise Kahen Ke Tujh Ko Bhi Hum Se Hai Vaasta Koi
Tu Ne To Hum Se Aaj Tak Koi Gila Nahin Kiya

Tu Bhi Kisi Ke Baab Mein Ahad-Shikan Ho Ghaaliban
Main Ne Bhi Ek Shakhs Ka Qarz Ada Nahin Kiya

Jo Bhi Ho Tum Pe Mu’tariz Us Ko Yahi Jawab Do
Aap Bahot Shareef Hain Aap Ne Kya Nahin Kiya

Jis Ko Bhi Sheikh-O-Shaah Ne Hukm-E-Khuda Diya Qaraar
Ham Ne Nahin Kiya Woh Kaam Haan Ba-Khuda Nahin Kiya

Nisbat-E-Ilm Hai Bahot Haakim-E-Waqt Ko Azeez
Us Ne To Kaar-E-Jehl Bhi Be-Ulaama Nahin Kiya

---------------------------