Jaun Elia - Maqtal Mein Pade Rahiye, Qaatil Nahin Aane Ka

Ek Zakhm Bhi Yaaraan-E-Bismil Nahin Aane Ka
Maqtal Mein Pade Rahiye, Qaatil Nahin Aane Ka

Ab Kooch Karo Yaaro Sehra Se Ke Suntey Hain
Sehra Mein Ab Aainda Mehmil Nahin Aane Ka

Gar Dil Ki Ye Mahfil Hai Kharcha Bhi Ho Phir Dil Ka
Baahar Se To Saamaan-E-Mahfil Nahin Aane Ka

Waaiz Ko Kharaabe Mein Ek Daawat-E-Haq Di Thi
Main Jaan Raha Tha Woh Jaahil Nahin Aane Ka

Buniyaad-E-Jahaan Pehle Jo Thi Wohi Ab Bhi Hai
Yoon Hashr To Yaaraan-E-Yak-Dil Nahin Aane Ka

But Hai Ke Khuda Hai Woh Maanaa Hai Na Maanoon Ga
Us Shokh Se Jab Tak Main Khud Mil Nahin Aane Ka

----------------------------