Meer Anees - Marsiya Of Hazrat Abbas

Nikla Woh Sher Khaime Ke Baahar Alam Liye
Mujre Ko Aayi Fath-E-Sipaah-E-Hasham Liye
Jurrat Ne Badh Ke Bosa-E-Taigh-E-Do Dum Liye
Nusrat Ne Choome Paanv, Zafar Ne Qadam Liye

Khurshid Ka Jalaal Nigahon Se Gir Gaya
Iqbal Sar Ke Gird Huma Ban Ke Phir Gaya

Aaya Saja Hua Woh Samand-E-Buraaq Sair
Tha Jo Falak Pe Udne Ko Taiyaar Misl-E-Tair
Hota Tha Us Ke Dar Se Ghazalon Ka Haal Ghair
In Mein Sipaah-E-Shar Usey Rokein, To Ye Bakhair

Sar Sar Qadam Ki Gard Ko Paati Nahin Kabhi
Dhoondhe Bashar, Pari Nazar Aati Nahi Kabhi

Wo Zaib-O-Zain Zeen Ki Wo Saaz Wo Phaban
Zevar Mein Jaise Hoti Hai Aaraasta Dulhan
Chashm-E-Siyaah Deeda-E-Aahu Pe Taana-Zan
Sar’at Ye Thi Ke Bhoolte The Chaukdi Hiran

Jaadu Tha Mu’jiza Tha Pari Thi Tilism Tha
Paakhur Na Thi Zirah Mein Tehemtan Ka Jism Tha

Rakkha Qadam Rakaab Mein Haider Ke Laal Ne
Na’lain-E-Paa Ko Fakhr Se Chooma Hilaal Ne
Bakhshi Jo Sadr-E-Zeen Ko Zia, Khush Khisaal Ne
Dum Ko Chawar Kiya Faras-E-Bemisaal Ne

Kis Naaz Se Woh Rashk-E-Ghazaal-E-Khutan Chala
Ta’oos Tha Ke Sair Ko Soo-E-Chaman Chala

Khushboo Se Arz-E-Paak Riyaaz-E-Jinaan Bani
Gard Ud Ke Ghaaza-E-Rukh-E-Laila Wishaan Bani
Jalwe Se Raah-E-Dasht-E-Bala Kahkashan Bani
Zarre Bane Nujoom, Zameen Aasmaan Bani

Sum Burd They To Naal Bhi Chaaron Hilaal They
Naqsh-E-Sum-E-Faras Se Hazaaron Hilaal They

Woh Dabdaba Woh Satwat-E-Shahana Woh Shabab
Tharraa Raha Tha Jis Ki Jalalat Se Aaftaab
Wo Ro’b-E-Haq Ke Sher Ka Zohra Ho Aab Aab
Saulat Mein Fard, Daftar-E-Jurrat Mein Intekhab

Tevar Mein Saare Taur Khuda Ke Vali Ke Hain
Shaukat Pukaarti Hai Ke Betey Ali Ke Hain

Pahunche Jo Dasht-E-Keen Mein Udatey Huey Faras
Ghodey Ko Haath Uttha Ke Yeh Aawaaz Di Ke Bas
Dekhein Safein Jami Jo Chap-O-Raas-O-Pesh-O-Pas
Na’ara Kiya Ke Neher Pe Jaane Ki Hai Hawas

Roke Ga Jo Woh Maut Ke Panje Mei Aaye Ga
Hat Jaao Sab Ke Sher Taraai Mein Jaaye Ga

Roke Humein Nikal Ke Jo Taaqat Kisi Mein Ho
Ley Taigh Miyaan Se Jo Shuja’at Kisi Mein Ho
Garmaaye Rakhsh Ko Jo Haraarat Kisi Mein Ho
Aaye Jo Harb-O-Zarb Ki Qudrat Kisi Mein Ho

Do Haath Mein Ali Ke Pisar Waar Paar Hain
Darya Nahin Jo Ruk Gaya, Hum Zulfiqaar Hain

Tum Kya Pahaad Beech Mein Gar Ho To Taal Dein
Sheron Ko Hum Taraayi Se Baahar Nikaal Dein
Mohlat Na Ek Ko Dam-E-Jung-O-Jadaal Dein
Paani To Kya Hai, Aag Mein Ghode Ko Daal Dein

Munh Dekhte Hain Jo Hain Nigehbaan Ghaat Ke
Le Jaayein Ghar Pe Taigh Se Darya Ko Kaat Ke

Sarkash Hain Sab Hamaari Zabardastiyon Se Zer
Daada Shuja’ Hai, Baap Ululazm, Hum Diler
Jab Ran Pada Hai Kar Diye Hain Zakhmiyon Ke Dher
Laaye They Jaa Ke Aag Se Paani Khuda Ke Sher

Afreet Bhaagte Hain Woh Chotein Hamaari Hain
Beerul Alam Mein Kood Ke Talwaarein Maari Hain

Jurrat Jilo Mein Rahti Hai Nusrat Rakaab Mein
Letey Hain Ghaat Pair Ke Taighon Ki Aab Mein
Likkhay Huey Hain Sheron Ke Hamle Kitaab Mein
Faslein Hain Apne Zor Ki Khaiber Ke Baab Mein

Naasir Hain Baadshah-E-Falak-Baargaah Ke
Daftar Ulat Diye Hain Arab Ki Sipaah Ke

Be Mashq Ke Bhare Humein Aata Hai Chain Kab
Garmi Mein Pyaas Se Kai Bachche Hain Jaan-Balab
Asghar Ki Godiyon Mein Tadapte Kati Hai Shab
Kya Waqt Hai Hussain Ke Bachchon Pe Hai Ghazab

Laale Pade Hue Hain Sakeena Ki Jaan Ke
Kaante Mujhay Dikhaaye They Sookhi Zabaan Ke

Ibrat Ki Yeh Jagah Hai Ke Hum Aur Sawaal-E-Aab
Saqqa Bane Hain Dekh Ke Bachchon Ka Iztaraab
Is Mashq Ne Kiya Humein Uqba Mein Kaamyaab
Allah Ri Aabroo Ke Behishti Mila Khitaab

Shah Se Nishaan-E-Fauj-E-Payambar Bhi Mil Gaya
Toobaa Ke Saath Chashma-E-Kausar Bhi Mil Gaya

Ye Zikr Tha Ke Fauj Ki Jaanib Se Teer Aaye
Naize Uttha Ke Sher Ke Munh Par Shareer Aaye
Ye Bhi Jhapat Ke Misl-E-Shah-E-Qilageer Aaye
Geti Hili Ghazab Mein Janaab-E-Ameer Aaye

Ghoda Uda Paron Ko Sawaaron Ke Tod Ke
Lapti Safon Pe Saif Bhi Kathi Ko Chhor Ke

Toda Ye Morcha, Ye Saf Ulti, Udhar Phire
Talwar Khoon Mein, Aap Paseene Mein Tar Phire
Yun Khaak Pe Gira Ke La’eenon Ke Sar Phire
Jaise Shikaar Khele Hue Sher-E-Nar Phire

Thi Qeher Ki Nigaah, Ghazab Ka Jamaal Tha
Aankhen Bhi Surkh Surkh Theen, Chehra Bhi Laal Tha

Beshak Tha In Ka Haath Ameer-E-Arab Ka Haath
Panhucha Wighaah Mein Sau Taraf Ek Tashna-Lab Ka Haath
Aayi Ajal Uttha Jo Kisi Be-Adab Ka Haath
Sher-E-Khuda Ke Sher Ne Maara Ghazab Ka Haath

Aise Jari Se Kis Ko Majaal-E-Masaaf Thi
Yun Phir Ke Saf Ki Saf Ko Jo Dekha To Saaf Thi

Chalta Tha Misl-E-Barq Yameen-O-Yasar Haath
Dar Dar Ke Jodte They Zalaalat-Sheyaar Haath
In Ki Na Ek Zarb Na Un Ke Hazaar Haath
Kaafi They Sab Ko Taigh-E-Do Dasti Ke Chaar Haath

Aawaaz Shash-Jahat Mein Bageed-O-Bazan Ki Thi
Allah Ka Karam Tha Madad Panjatan Ki Thi

Badh Badh Ke Kaatati Thi Woh Talwar Haath Paanv
Dar Se Badha Na Sakte They Khoon-Khwaar Haath Paanv
Sar Bach Gaya To Ho Gaye Be-Kaar Haath Paanv
Chamki Woh Yun Ke Aanth Hue Chaar Haath Paanv

Roohein Pukaarein Sher Phir Aaya Nikal Chalo
Boli Ajal, Ab Uth Ke To Panjon Ke Bal Chalo

Pahne Hue They Jism Pe Zirhen Jo Chust Chust
Choten Kadi Padeen To Hue Sab Wo Sakht Sust
Khauf-E-Ajal Se Bhool Gaye Wa’da-E-Nakhust
Tooti Safon Mein Haath Kisi Ke Na They Durust

Ik Shor Tha Ke Jaan Gayi Is Ladaai Mein
Ghode Bhagaao, Aag Lagi Hai Taraayi Mein

Maghfar Na Sar Ke Paas Na Khanjar Kamar Ke Paas
Betey Ke Paas Baap Na Beta Pidar Ke Paas
Qabze Ke Paas Taigh Na Dasta Tabar Ke Paas
Kadiyaan Zirah Ke Paas Na Daaman Sipar Ke Paas

Abvi Sinaan Par Thi Na Parcham Nishaan Par
Paikaan Na Teer Par They Na Chilley Kamaan Par

Allah Re Jung-E-Sher-E-Nayastaan-E-Karbala
Choonti Bhi Morchon Mein Na Thi Aadmi To Kya
Panhuche Taraayi Mein To Ye Aada Ko Di Sada
Kyon? Ab Ye Naher Kis Ki Hai, Ai Qaum-E-Ashqaya

Ek Aan Mein Shikast Hazaaron Ko Dete Hain
Dekho Asad Taraayi Ko Yun Chheen Lete Hain

Raste Khule Hue Hain Kahaan Hai Wo Bandobast
Kisne Ye Room-O-Shaam Ki Faujon Ko Di Shikast
Kya Ho Gaye Taraayi Se Woh Sab Hawa Parast
Kyon Sar-Baland Kaun Hai Is Waqt, Kaun Past

Faujon Mein Yun Kisi Ne Bhi Ghode Udaayein Hain
Dekho To Hum Kahan Se Kahan Ladte Aaye Hain

Duniya Bhi Ek Taraf Ho To Hum Pe Zafar Na Paaye
Faaqon Mein Sher Bhi Ho Muqabil To Munh Ki Khaaye
Kis Dabdabe Se Jauhar-E-Jung-E-Ali Dikhaaye
Ab Kuch Alam Nahin, Ajal Aaye Ke Jaan Jaaye

Bas Hum Ne Ghaat Chheen Liya, Mashk Bhar Chuke
Sheron Ne Jo Zabaan Se Kaha Tha Wo Kar Chuke

Lab Tashna Teen Din Se Hain Aur Hai Furaat Paas
Chaahein Abhi To Haath Badha Kar Bujhaayein Pyaas
Par Zeher Hai Baghair Shah-E-Aasmaa Asaas
Marte Hain Aabru Pe Gulamaan-E-Haq-Shanaas

Aaqa Ki Tashnagi Pe Jigar Chaak Chaak Hai
Be In Ke Aab-E-Khizr Bhi Howe To Khaak Hai

Farma Ke Ye Samand Ko Daala Furaat Mein
Goya-E-Khizr Utar Gaye Aab-E-Hayaat Mein
Darya-Dil Aisa Kaun Hua Kaaynaat Mein
Tasma Pakad Ke Mashk Bhari Ek Baar Mein

Sairaab Jab Talak Ke Shah-E-Behr-O-Bar Na Hon
Manzoor Hai Ke Haath Bhi Paani Se Tar Na Hon

Darya Se Mashk Bhar Ke Jo Nikla Wo Nek-Naam
Umdi Siyah Ghata Ki Tarah Sab Sipaah-E-Shaam
Yun Doob Ke Nikalta Tha Woh Aasmaan-Maqaam
Zaahir Ho Jaise Abr Mein Chhup Kar Mah-E-Tamaam

Maujein Thin Rood-E-Neel Ki, Faujon Ka Dal Na Tha
Par Waah Re Hawaas Ke Abru Pe Bal Na Tha

Ghere The Ek Jaan Ko Do Laakh Ahl-E-Shar
Thahren Kahaan, Qaraar Kahaan Len, Thamen Kidhar
Chhati Ke Paas Barchhiyaan, Taighein Qareeb-E-Sar
Pehlu Mein Is Taraf To Sinaanein, Udhar Tabar

Milti Na Thi Amaan Sipah-E-Teera-Bakht Se
Goshon Se Teer Chalte They Patthar Darakht Se

Jab Mashk Ki Taraf Koi Aata Tha San Se Teer
Kehte They Ya Hafeez Kabhi Gaah Ya Qadeer
Chilla Raha Tha Shimr-E-Jafa Pesha-O-Sharar
Jaane Na Paaye Lakhte Dil-E-Shaah-E-Qila-Geer

Rukh Is Jari Ka Khaime Ki Jaanib Se Mod Do
Haan Barchhiyon Se Sher Ke Seene Ko Tod Do

Sun Kar Zabaan Daraazi-E-Shimr-E-Sitam-She’aar
Abbas Misl-E-Sher Jhapatte They Baar Baar
Talwaarein Saikdon Theen, Hazaaron The Naiza-Daar
Todi Agar Yeh Saf To Jami Doosri Qataar

Tanha Sambhaale Mashk-O-Alam Ya Wigha Kare
Balwa Ho Puri Fauj Ka Jis Par Wo Kya Kare

Mashhoor Hai Ke Ek Pe Bhaari Hain Do Bashar
Dar Pe They Ek Jawaan Ke Liye Laakh Ahl-E-Shar
Khaaye Idhar Se Zakhm Jo Ki Us Taraf Nazar
Kis Kis Ka Waar Rad Karein Dekhein Kidhar Kidhar

Jab Dum Liya To Seene Pe Sau Teer Chal Gaye
Pehlu Ko Tod Tod Ke Naize Nikal Gaye

Seena-Sipar They Mashk Pe Roke Hue They Dhaal
Ladne Mein Bhi Hussain Ke Bachchon Ka Tha Khayaal
Kehta Tha Dagmaga Ke Faras Par Wok Khush-Khisaal
Farzand Ko Sambhaaliye, Ya Sher-E-Zul-Jalaal

Jaa Panhuchoon Mashk Le Ke Jo Thodi Si Raah Ho
Aisa Na Ho Ke Pyaason Ki Basti Tabaah Ho

Yeh Kahte They Ke Toot Pada Lashkar-E-Shareer
Bas Chur Ho Gaya Pisar-E-Shaah-E-Qilla-Geer
Aa Kar Laga Miyaan-E-Do-Abroo Pe Ek Teer
Teora Gaya Ali-E-Wali Ka Mah-E-Muneer

Chhori Jo Baag Paanv Faras Ke Bhi Ruk Gaye
Phaila Ke Haath Mashk-E-Sakina Pe Jhuk Gaye

Shah Daud Kar Pukaare Ke Aata Hun Bhaijaan
Ghar Lut Gaya Hai Khaak Udata Hun Bhaijaan
Taaqat Badan Mein Ab Nahin Paata Hun Bhaijaan
Ek Ek Qadam Pe Thokarein Khata Hun Bhaijaan

Dast-E-Shikasta Bete Ki Gardan Mein Dale Hain
Bhaiyya Humein To Akbar-E-Mehru Sambhaale Hain

Akbar Ne Shah Ke Haath Pakad Kar Basad Buka
Rakkhe Chacha Ke Seene Pe Aur Ro Ke Ye Kaha
Leeje Yahi Hai Laash-E-Alamdaar-E-Ba-Wafa
Chillaaye Jhuk Ke Laash Pe Sultan-E-Karbala

Tooti Huyi Kamar Hai Sambhaalo Hussain Ko
Bhaiyya Zara Gale Se Laga Lo Hussain Ko

Abbas Haath Kat Gaye Shaanon Se Hai Ghazab
Reti Pe Do Taraf Hai Tumhara Lahu Yeh Sab
Loota Humein Rasool Ki Ummat Ne Be-Sabab
Bhaiyya Humari Jaan Nikalti Hai Tan Se Ab

Mar Jaayen Ge, Jila Do Humein Munh Se Bol Ke
Do Baatein Kar Lo Bhai Se Aankhon Ko Khol Ke

Ghash Mein Suni Jo Girya-E-Shabbir Ki Sada
Chanuke Tadap Ke Hazrat-E-Abbas-E- Ba-Wafa
Aahista Ki Yeh Arz Ke Ai Sibt-E-Mustafa
Is Pyaar Ke Nisaar, Is Ulfaat Ke Fida

Zeba Hai Nikle Jaan Agar Peshwaai Ko
Goya Rasool Aaye Hain Mushkil-Kushaayi Ko

Ye Kah Ke Roye, Shah Ki Taraf Ki Nazar Ba-Ghaur
Jhuk Kar Pukaare Shaah Ke “Bhaiyya Kaho Kuch Aur”
Tadpa Qadam Pe Shah Ke Woh Maqtool-E-Zulm-O-Jaur
Leen Hichkiyaan, Bigadne Lage Tewaron Ke Taur

Pathra Ke Chashm-E-Ashk-Fishaan Band Ho Gayi
Tharraaye Donon Hont, Zabaan Band Ho Gayi

Akbar Ne Arz Ki Ke Chacha Jaan Mar Gaye
Jhuk Kar Pukaare Shaah Ke “Bhaiyya Kidhar Gaye”
Munh To Uthaao Khaak Se Rukhsaar Bhar Gaye
Wa Hasrataa, Hussain Ko Be-Aas Kar Gaye

Ab Kaun Dega Dukh Mein Nabi Ke Pisar Ka Saath
Dum Bhar Mein Tum Ne Chhor Diya Umr Bhar Ka Saath

Haan Ro Lo Mominon Ke Buka Ka Maqaam Hai
Tum Mein Shareek Rooh-E-Rasool-E-Anaam Hai
Ab Rukhsat-E-Hussain Alaihis-Salaam Hai
Tareekh Aathwin Hai, Moharram Tamaam Hai

Maut Aayi To Shareek-E-Aza Kaun Howe Ga
Jo Saal Bhar Jiye Ga Woh Phir Shah Ko Rowe Ga

Aage Tumhaare Marte Jo Abbas-E-Bawafa
Pursa Na Dete Sibt-E-Rasool-E-Khuda Ko Kya
Tum Sab Ko Dekhte Hain Shahenshah-E-Karbala
Zehra Bhi Nang-E-Sar Hain, Qayamat Karo Bapa

Samjho Shareek-E-Bazm Shah-E-Mashraqain Ko
De Lo Jawaan Bhai Ka Pursa Hussain Ko

Peeto Saron Ko Hota Hai Ab Marsiya Tamaam
Lipto Zari-E-Paak Se Kah Kah Ke “Ya Imaam”
Rukhsat Talab Hai Baap Se Akbar Sa Laala-Faam
Khamosh Hain Hussain, Nahin Karte Kuchh Kalaam

Maqtool Zulm-O-Jaur Hai Ab Ran Mein Fatima
Hota Hai Panjatan Ka Koi Dum Mein Khatima

Bas Ai ‘Anees’ Rok Le Ab Khaama Ki Inaan
Yeh Ghum Hai Jaan-Guza, Na Kabhi Howega Bayaan
Aankhon Se Saama’een Ke Bhi Askh Hain Rawaan
Khaliq Se Arz Kar Ke Ai Khallaq-E-Ins-O-Jaan

Aankhon Se Mas Karun Main Mazaar-E-Batool Ko
Dikhla De Jald Marqad-E-Sibte Rasool Ko

-------------------