Meer Anees - Nikli Jo Run Mein Taigh-E-Hussaini Ghilaaf Se

Nikli Jo Run Mein Teigh-E-Hussaini Ghilaaf Se

Udne Lage Sharar Dam-E-Khara Shigaaf Se

Bijli Badhi Chamak Ke Jo Dasht-E-Musaaf Se

Saaf Aayi Al- Amaan Ki Sada Ko-E-Qaaaf Se

Tabqe Falak Ke Soorat-E-Gahwara Hil Gaye

Dab Ke Pahaad Khaak Ke Daaman Mein Mil Gaye

Larza Tha Taht-O-Fauq-O-Junoob-O-Shumaal Mein

Sikkan-E-Ghurb-O-Sharq They Beem-O-Zawaal Mein

Muztar They Shashjahat Ke Makeen Ek Haal Mein

Ghul Tha Ki Ghir Gaye Ghazab-E-Zul-Jalaal Mein

Shah Ka Ghazab Namoona-E-Qahr-Allah Tha

Talwar Kya Alam Thi Ke Aalam Tabaah Tha

Rahat Mein Jinn-O-Uns-O-Malak Ki Khalal Pade

Qulzum Mein Dar Ke Mardam-E-Aabi Uchhal Pade

Kha Kha Ke Josh Khaak Se Chashme Ubal Pade

Bairul Alam Se Ghol Jinon Ke Nikal Pade

Ulti Zamin Sabhi Ke Daaon Pe Yeh Than Gayi

Pariyon Ke Hosh Udd Gaye Jaanon Pe Ban Gayi

Ghul Tha Ki Zarb-E-Tegh-E-Ali Se Khuda Bachaaye

Yeh Barq Dekhiye Kise Phoonke Kise Jalaaye

Qahr-E-Khuda Se Bach Ke Koi Kis Taraf Ko Jaaye

Bach Jaaye Aaj Woh Jo Dobara Hayat Paaye

Faulad Ho Ki Sang Yeh Munh Modti Nahin

Bedum Kiye Kisi Ko Kabhi Chorti Nahin

Tharra Rahe They Sher Zah-E-Haibat-E-Hussain

Geeti Ko Zalzala Tha Zah-E-Shaukat-E-Hussain

Faaqon Mein Kam Hui Thin A Kuch Taaqat-E-Hussain

Ek Qudrat-E-Khuda Thi Khusha Qudrat-E-Hussain

Sookhi Hui Zabaan Pe Kisi Ka Gila Na Tha

Solah Pahar Huwe They Ke Paani Mila Na Tha

Faaqon Se Rang Zard Toh Lab Pyaas Se Kabood

Chehre Se Tha Jalaal Jahaan Aafreen Namood

Karta Tha Noor-E-Haq Jo Soo-E-Aasmaan Saood

Tasbih Padh Rahe They Malak Aur Bashar Durood

Tham Jaate They Hussain Jo Talwar Taul Kar

Hooren Balaayen Leti Thin Gharfon Ko Khol Kar

Rukhsar Hain Who Gul Jinhen Khauf-E-Khuda Nahin

Tukde Hain La’l Ke Lab-E-Sheerin-Bayan Nahin

Hai Maahi-E-Muheet Fasahat Zuban Nahin

Yeh Fart-E-Naaz Ki Hai Ki Goya Wahan Nahin

Baaton Mein Band Hain Fasaa Kaayenaat Ki

Sadqe Hain Baat Baat Pe Kooze Nabaat Ke

Woh Aahani Kulah, Woh Zirah Jaama-E-Huzoor

Jis Ki Har Ek Kadi Se Nikalta Tha Chhan Ke Noor

Halqe Woh Jin Ko Dekh Ke Sharmaaye Chashm-E-Hoor

Qandeel-E-Aahani Mein Farozaan Hai Shama-E-Toor

Joshan Na Tha Tan-E-Shah-E-Gardoon-Waqaar Mein

Taare Chamakte They Shab-E-Taareek-O-Taar Mein

Masroof Jung-E-Taigh Mein They Ibne-Qillageer

Nikla Pare Se Ek Qadar-Andaaz-E-Be-Nazeer

Bad Kesh-O-Kaj Nihaar-O-Khata Pesha-O-Sharar

Palle Se Tod Deta Tha Joshan Ko Jis Ka Teer

Kya Koi Is Ke Aage Bhala Sar Utthaa Sake

Rustam Bhi Jis Kamaa Ka Na Seesar Uttha Sake

Qabze Mein Taigh Leke Pukaare Shah-E-Zamaan

Haan, Naavak Afghani Mujhe Dikhla To Ai Jawaan

Haan, Nikli Moonh Se Yaan, Ke Khinchi Us Taraf Kamaan

Khinchna Kamaan Ka Tha Ke Chala Teer-E-Be-Amaan

Halqa Udhar Kamaan Ka Kham Ho Ke Reh Gaya

Yaan Taigh-E-Shah Se Teer Qalam Ho Ke Reh Gaya

Khali Isi Ravish Se Hua Tarkash-E-Shareer

Toode Lagaaye Kaat Ke Hazrat Ne Saare Teer

Chaha Tha Kashmakash Mein Ke Ho Jaaye Gosha-Geer

Chillaaye Sheh, Ke Bhaag Na-O-Sarkashon Ke Peer

Peechhe Hatein Na Paaon, Mazaa Hai Ye Jung Ka

Tu Bhi To Tod Dekh Le Mere Khudang Ka

Yaan Dosh Se Kamaan Ko Utara Janaab Ne

Qabze Mein Maah-E-Nau Ko Kiya Aaftaab Ne

Betey Ke Haath Choom Liye Boo-Turab Ne

Taaka Khata Ko Teer-E-Nigaah Se Sawaab Ne

Tarkash Bhi Azhdaha Sa Dahen Knolne Laga

Nikla Uqaab-E-Teer To Par Taulne Laga

Chilley Mein Rakh Ke Teer Badhe Qibla-E-Umam

Ek Haath Raast Kar Ke Kiya Doosre Ko Kham

Kuch Keh Ke Gosh-E-Sheh Mein Chala Teer-E-Tez Dum

Awaaz Di Kamaan Ne Zahe Shaah-E-Baa-Karam

Chilla To Shusht-E-Shaah-E-Zaman Se Nikal Gaya

Waan Teer Dil Ko Tod Ke San Se Nikal Gaya

Gurz-O-Sinaan-O-Taigh-O-Tabar Kaanpne Lage

Naize Misaal-E-Shaakh-E-Shajar Kaanpne Lage

Dar Se Kamman Kashon Ke Jigar Kaanpne Lage

Go Tarkashon Mein Teer They, Par Kaanpne Lage

Peechhe Hate, Khade They Jo Zaalim Badhe Hue

Goshon Se Khud Utar Gaye Chille Chadhe Hue

    

 ---------------------