Jaun Elia - Thi Guzisht Un Ki Ajeeb Hi

Thi Guzisht Un Ki Ajeeb Hi Woh Jo Jaan Se They Guzar Gaye
Hai Tamaam Shehr Tahayyari, Jo Teri Gali Ke They Ghar Gaye

Shab-O-Roz Ka Hai Mua’amla, Na Koi Sila Na Koi Gila
Woh Mua’amala Dil-O-Jaan Ka Tha, Kabhi Jee Uthe Kabhi Mar Gaye

Tumhen Apna Haal Sunayein Kya, Tumhen Ramz Koi Bataayen Kya
Woh Chala Gaya To Chalaa Gaya, Woh Jo Aa Gaya To Sanwar Gaye

Nahin Mujh Mein Ab Koi Dilbari Ke Nafas Nafas Hai Sitam-Gari
Mere Saare Rang Utar Gaye, Mere Saare Khawaab Bikhar Gaye

Kabhi Jashn-E-Gham Bhi Manaayen Hum, Karen Raqs Aur Kabhi Gaayen Hum
Woh Tumhaare Shaam-O-Sehar Gaye, Woh Humaare Shaam-O-Sehar Gaye

------------------------